ඉදිරියේදී මෙරට කුරුඳු චීනය වෙතද අපනයනය කිරීම සඳහා මේ වනවිට සාකච්ඡා සිදුවෙමින් ඇති බව අපනයන කෘෂිකර්ම දෙපාර්තමේන්තුවේ අධ්‍යක්ෂ ජනරාල් ඒ.පී.පී දිස්නා පැවසුවාය.
මේ වනවිටත් මෙක්සිකෝව, ඇමරිකා එක්සත් ජනපදය වැනි රටවලට මෙන්ම පේරු රාජ්‍ය වෙතද කුරුඳු අපනයනය කරන අතර ලොව ඇති ඉහළම කුරුඳු පවතින්නේ ශ්‍රී ලංකාවේය.
අපනයන වෙළෙඳපොළ තුළ කැෂියා කුරුඳු සහ සත්‍ය කුරුඳු ලෙස කුරුඳු වර්ග දෙකක් පවතින අතර මේ අතරින් සත්‍ය කුරුඳුවලට අනුකරණයක් ලෙස කැෂියා කුරුඳු හඳුන්වාදී තිබේ. නමුත් මෙම කුරුඳු සත්‍ය කරුඳුවල ගුණාත්මක බවට වඩා ගුණාත්මක බව අතින් පහළින් ඇති බැවින් ලංකාවේ නිෂ්පාදනය කරනු ලබන සත්‍ය කුරුඳු සඳහා තවමත් විශාල ඉල්ලුමක් පවතී.
මෙම කැෂියා කුරුඳු නිෂ්පාදන රටවල් අතර මේ වන විට චීනය ඉහළින්ම සිටින නිෂ්පාදකයෙක් වේ. එබැවින් මෙරට කුරුඳු චීනය වෙත අපනයනය කිරීමට අවස්ථාව හිමිවුවහොත් එය මෙරට අපනයන ක්ෂේත්‍රයේ සුවිසල් පිම්මක් වනු ඇති බවයි අධ්‍යක්ෂ ජනරාල්වරිය සඳහන් කළේ.