67 හැවිරිදි පුද්ගලයෙකුට තර්ජනය කර බිය ගන්වා රුපියල් ලක්ෂ 69ක මුදලක් බලහත්කාරයෙන් බැංකු ගිණුමක තැන්පත් කරගත් බව කියන 57 හැවිරිදි කාන්තාවක් පොලීසිය විසින් අත්අඩංගුවට ගෙන තිබේ.
නිට්ටඹුව මූලස්ථාන පොලිසියේ අපරාධ විමර්ශන අංශය පැවසුවේ මොවුන් දෙදෙනා මංගල දැන්වීමකින් දැන හඳුනාගෙන විවාහ වීමේ අපේක්ෂාවෙන් සිටි දෙපළක් බවයි.
මෙම කාන්තාව විසින් තමාගේ පියයුරේ නහරයක් පුපුරා ගොස් ඇති නිසා එය ශල්‍යකර්මයකින් නැවත සකස් කර ගැනීමට යැයි පවසා මෙම මුදල ලබාගෙන ඇති බවයි වාර්තා වන්නේ.
මහනුවර, ගන්නෝරුව ප්‍රදේශයේදීයි සැකකාරිය අත්අඩංගුවට ගෙන ඇත්තේ.
මෙලෙස මෙම කාන්තාවට මුදල් ලබා දී ඇත්තේ නිට්ටඹුව පොලිස් වසමේ පදිංචි කර්මාන්තශාලාවක සහකාර නිලධාරියෙකු ලෙස සේවය කර විශ්‍රාම ලබා සිටින 67 හැවිරිදි පුද්ගලයකු විසිනි.
මීට වසර 8කට පමණ ඉහතදී බිරිඳගෙන් දික්කසාද වී ඔහුගේ සහෝදරියකගේ නිවසේ පදිංචිව සිටින අතරතුරදීයි ඔහු මෙම මංගල දැන්වීම පළකර ඇත්තේ.