දෛනික ඉන්ධන අවශ්‍යතාව ඉහළ ගොස් ඇති බවත් ඒ අනුව සතියකට මෙට්‍රික් ටොන් 5,500ක්ව පැවැති ඩීසල් ඉල්ලුම මේ වන විට මෙට්‍රික් ටොන් 8,000ක් දක්වා ඉහළ ගොස් ඇති බවත් ලංකා ඛනිජ තෙල් නීතිගත සංස්ථාව පවසයි.
එමෙන්ම මෙට්‍රික් ටොන් 3,000ක්ව පැවැති පෙට්‍රල් ඉල්ලුම මෙට්‍රික් 4,500ක් දක්වා ඉහළ ගොස් ඇති අතර මෙය බරපතළ තත්ත්වයක් බව පෙන්වාදෙන ඛනිජ තෙල් නීතිගත සංස්ථාවේ සභාපතිවරයා කියා සිටියේ මෙය පාලනය කිරීම සඳහා අවශ්‍ය ක්‍රියාමාර්ග කඩිනමින් ගතයුතු බවයි.
මෙම සතියේදී ඉන්ධන නෞකා 05ක් දිවයිනට ළඟාවීමට නියමිතය. එම ඉන්ධන නෞකා පැමිණිය හොත් ලංකා විදුලිබල මණ්ඩලයටද ඉන්ධන ලබාදීමේ හැකියාවක් පවතින බව සභාපතිවරයා වැඩිදිරටත් අවධාරණය කළේය.
මේ අතර බලශක්ති අමාත්‍ය උදය ගම්මන්පිල පවතින ඉන්ධන අර්බුධය සම්බන්ධයෙන් කිරිදිවෙල ප්‍රදේශයේ පැවැති උත්සවයකදී මෙලෙස අදහස් පළ කළේය.
“රුපියල් 200ට ගේන ඩීසල් ලීටර 150 විකුණුවොත් රුපියල් 50ක් අඩුයිනේ. ඊළඟ පාර 200ට ගේන්න අපිට සල්ලි මදි. එතකොට ඒ රටට තෙල් ගේන එක නතර කරන්න වෙනවා. බදු නිදහස කිරීම කළේ නැත්නම් අනිවාර්යෙන්ම ඒ අඩුපාඩුවත් ජනතාව මතම පටවන්න වෙනවා. එතකොට ආර්ථිකයට දරාගන්න බැරි, සමාජයට දාරගන්න බැරි දැවැන්ත ඉන්ධන මිල වැඩිකිරීමක් සිදුවීම වළක්වා ගතහැකි එකම ක්‍රමය තෙල්මත ඇති බදු ඉවත්කිරීම පමණමයි. බදු සහන ලබාදුන්නොත් ඉන්ධන මිල වැඩිකිරීම ඉතා පොඩි ප්‍රමාණයකින් පමණක් කරන්න පුළුවන්. ඒ බදු සහනය නොලැබුණොත් අපට සිදුවෙනවා ඩීසල් ලීටරයක් රුපියල් 52කින්, පෙට්‍රල් ලීටරයක් රුපියල් 19කින් ඉහළ දාන්න. එවැනි දැවැන්ත මිල ඉහළ දැමීමක් ජනතාවට දරාගැනීමට බැරි නිසා තමයි බදු ඉවත්කරලා දෙන්න කියන්නේ. බදු ඉවත් කළොත් ඇත්තෙන්ම ඉතා සුළු ඉහළ දැමීමකින් අපිට මේ ප්‍රශ්නය විසඳගන්න පුළුවන්.”