යුද සමයේදී ආබාධිත තත්ත්වයට පත් වී වෛද්‍ය හේතුන් මත ත්‍රිවිධ හමුදා සේවයෙන් ඉවත් වන සාමාජිකයින් වෙත වයස අවුරුදු 55 දක්වා සහ වැන්දඹු බිරින්දෑවරුන්ට ජීවිතාන්තය දක්වා එම දීමනා එලෙසම ලබාදීමට ආරක්ෂක අමාත්‍යාංශය තීරණය කර තිබේ.
ආරක්ෂක අමාත්‍යාංශය වැඩිදුරටත් අවධාරණය කරන්නේ දැනට පවතින විධිවිධාන අනුව ආබාධිත හමුදා සාමාජිකයා වයස අවුරුදු 55ට පෙර මියගියහොත් එම වැන්දඹුව වෙත මෙලෙස වැටුප් හා දීමනා ලබාදීම සඳහා හමුදා සාමාජිකයා මියගියේ ආබාධිත තත්ත්වයේ සෘජු ප්‍රථිපලයක් නිසාවෙන් බව වෛද්‍ය මණ්ඩලයක් විසින් තහවුරු කළ යුතු බවයි.
එය තහවුරු කළ නොහැකි වන්නේ නම් ආබාධිත හමුදා සාමාජිකයා මියගියහොත් එම වැන්දඹුව වෙත ලබාදිය හැක්කේ වැන්දඹු හා අනත්දරු විශ්‍රාම වැටුප පමණක් බවයි ආරක්ෂක අමාත්‍යංශය පවසන්නේ.
විශ්‍රාමලත් ආබාධිත හමුදා සාමාජිකයන් සහ ඔවුන්ගේ පවුල්වල සාමාජිකයන් මෙ සම්බන්ධයෙන් අනියත බියක් ඇති කර නොගත යුතු අතර ඇතැම් පාර්ශවයන් විසින් මේ සම්බන්ධව ආබාධිත හමුදා සාමාජිකයින් සහ ඔවුන්ගේ පවුල්වල සාමාජිකයින් තුළ ව්‍යාකූල තත්වයක් ඇති කිරීමට උත්සහ කරන අවස්ථා නිරීක්‍ෂණය වී ඇති බවත් ආරක්ෂක අමාත්‍යංශය සඳහන් කළේය.