ප්රංශයේ දැඩි කොන්දේසි යටතේ ස්වෙච්ඡාවෙන් ජීවිතය අවසන් කිරීම සඳහා නීතිමය අවසර ලබාදීමේ පනත් කෙටුම්පතට එරට පාර්ලිමේන්තුවේ අනුමැතිය හිමිවී තිබේ.
වසර ගණනාවක් පුරා දේශපාලන හා සමාජීය මට්ටමින් විවාදයට ලක්ව තිබූ මෙම පනත් කෙටුම්පත පාර්ලිමේන්තුවේ ඡන්ද විමසීමේදී මන්ත්රීවරුන් 291 දෙනෙකුගේ සහාය ලබාගෙන සම්මත වූ අතර, ඊට විරුද්ධව ඡන්ද 241ක් ප්රකාශ වී ඇත.
කෙසේ වෙතත්, මෙම පනත් කෙටුම්පත නීතියක් ලෙස ක්රියාත්මක වීමට පෙර එහි වගන්ති ප්රංශ ආණ්ඩුක්රම ව්යවස්ථාවට අනුකූලදැයි තහවුරු කිරීම සඳහා ව්යවස්ථාපිත කවුන්සිලයේ සමාලෝචනයට යොමු කිරීමට නියමිතය.
මෙම යෝජනාව මීට පෙර ප්රංශයේ ඉහළ මන්ත්රී මණ්ඩලය වන සෙනෙට් සභාව විසින් කිහිප වතාවක්ම ප්රතික්ෂේප කර තිබුණි.
අදාළ පනත අවසන් වශයෙන් සම්මත වුවහොත්, එහි ප්රතිලාභ හිමිවන්නේ සුව කළ නොහැකි මාරාන්තික රෝගයක අවසාන අදියරේ පසුවන ප්රංශයේ වැඩිහිටි රෝගීන්ට පමණි.
එම අවසරය ලබා ගැනීම සඳහා අයදුම්කරු ප්රතිකාර මඟින් සමනය කළ නොහැකි දැඩි ශාරීරික හෝ මානසික වේදනාවකින් අඛණ්ඩව පෙළෙන රෝගියකු විය යුතු අතර, තමන්ගේම කැමැත්තෙන් වෛද්යවරයකු වෙත නිල ඉල්ලීමක් ඉදිරිපත් කළ යුතුය. එම ඉල්ලීම ලැබීමෙන් පසු දින 15ක් ඇතුළත වෛද්යවරයා ඒ පිළිබඳ තීරණයක් ලබාදිය යුතු බව ද එම පනත් කෙටුම්පතේ සඳහන් වේ.