ඉතිරි සති කිහිපය තුළ පාසල් සිසු සිසුවියන් ලක්ෂ අටකට පාවහන් ගැනීම සඳහා රුපියල් තුන්දහසක වටිනාකමින් යුත් වවුචර්පත් ප්‍රදානය කරන බව අධ්‍යාපන අමාත්‍ය සුසිල් ප්‍රේමජයන්ත පවසනවා.
අමාත්‍යවරයා මේ බව කියාසිටියේ ගාල්ල ගිංතොට සහිරා විද්‍යාලයේ පැවති උත්සවයකට එක්වෙමින්.
ආර්ථික දුෂ්කරතා සහිත දරුවන් වෙනුවෙන් ලබා දෙන මෙම දීමනාව ඉදිරි 2024 වර්ෂයේ දී තවදුරටත් වැඩි කරන බවයි අමාත්‍යවරයා කියා සිටියේ.
2024 වර්ෂයේ සිට අධ්‍යාපන පරිවර්තනීය වෙනස්කම් ක්‍රියාවට නංවමින් පරිපාලන වෙනස්කම් වෙත මුලින්ම පිවිසෙන බවත් විෂය මාලා සංවර්ධනය සඳහා ද ප්‍රමුඛ අවධානයක් යොමු කර ක්‍රියා කරන බවත් මෙහිදී අමාත්‍යවරයා ප්‍රකාශ කළා.
මෙම නව ක්‍රියාකාරකම් හමුවේ සිසුන් දෛනිකව පාසල් පැමිණ පන්ති කාමරය තුළ රැඳී සිටිමින් මොඩ්‍යුලර් ක්‍රියාකාරකම්වල නියැලීම අනිවාර්ය වන බවයි ඔහු අවධාරණය කළේ.
ප්‍රාථමික පන්තිවල විභාග හැකි තාක් අවම කිරීමට මෙන් ම පූර්ව ළමා විය ඉගැන්වීම් විධිමත් කිරීමට සහ ප්‍රාථමික ගුරුවරුන් වශයෙන් උපාධිධාරී පුහුණු ගුරුවරුන් බඳවාගනිමින් ප්‍රාථමික අධ්‍යාපන ක්ෂේත්‍රයේ ගුණාත්මක පක්ෂය ඉහළ නැංවීමට අපේක්ෂා කරන බව ද අධ්‍යාපන අමාත්‍යවරයා සඳහන් කළා.
විද්‍යා, ගණිත, ඉංග්‍රීසි, තාක්ෂණ වැනි විෂයන් සඳහා උපාධිධාරීන් 5450ක් බඳවා ගැනීමට මේ දිනවල නිවේදන නිකුත් කර ඇති බව ප්‍රකාශ කළ අමාත්‍යවරයා ඉන් ජාතික පාසල් සඳහා 1700ක් සිංහල, දෙමළ, ඉංග්‍රීසි යන මාධ්‍ය තුනෙන් ම බඳවාගනු ලබන බවත් විශ්‍රාමයෑම, රට හැර යාම වැනි හේතු නිසා පළාත් මට්ටමින් මතු වී ඇති ගුරු පුරප්පාඩු සඳහා අදාළ බඳවාගැනීම් සිදු කිරීමට ද අනුමැතිය ලබා දී ඇති බවත් සඳහන් කළා.
අනතුරුව රටේ ගුරු ඌනතාව බෙහෙවින් වලක්වාගත හැකි වනු ඇති බවයි ඔහු පෙන්වා දුන්නේ. එසේ ම නව පරිපාලනමය ව්‍යුහය මත පර්ෂද පාසල් සංකල්පය මත පාසල් පර්ෂද තුළ ගුරු තුලනයන් සිදු කරගැනීම මගින් යම් ගුරු හිඟයක් වෙතොත් එය කළමනාකරණය කරගත හැකි වනු ඇතැයි ද අමාත්‍යවරයා කියාසිටියා. පාසල් විනය යථාවත් කර පවත්වාගෙන යාම සම්බන්ධයෙන් මෙහි දී සිහිපත් කළ අමාත්‍යවරයා කියාසිටියේ ලබන වසර වන විට උසස් පෙළ විෂය ධාරාව සහිත පාසල් 3000ක පමණ ඩිජිටල්කරණ ක්‍රියාවලිය ද සිදු කර අවසන් කරන බවයි.
එසේ ම ලබන වසරේ සිට පාසල්වල අත්‍යවශ්‍ය ඉදිකිරීම් කටයුතු වෙනුවෙන් වැඩි මුදල් ප්‍රමාණයක් වෙන් කරන අතර ඒ යටතේ අඩක් අවසන් කර ඇති පාසල් ගොඩනැගිලිවල ඉදිකිරීම් කටයුතු නිමා කිරීමටත් නව විද්‍යාගාර වැනි අත්‍යවශ්‍ය ඉදි කිරීම් සිදු කිරීමටත් හැකියාව ලැබෙන බව අමාත්‍යවරයා මෙහි දී සඳහන් කළා.