අවාරයේ ශ්‍රී පාදස්ථානයේ සංචාරයන් සඳහා පැමිණෙන දෙස් විදෙස් සංචාරකයන්ගෙන් මුදල් අයකර ප්‍රවේශපත්‍ර නිකුත් කිරීමට විරෝධය පාමින් අද (08) විරෝධතාවක් පැවැත් වුණා.
නල්ලතන්නිය වනජීවී කාර්යාලය ඉදිරිපිට මෙම විරෝධතාව පැවැත් වුණේ මහා සංඝ රත්නය සහ ප්‍රදේශවාසීන්ගේ සහභාගීත්වයෙන්.
වන සංරක්ෂණ දෙපාර්තුමේන්තුව මඟින් 2022 වසරේ අවාරයේ ශ්‍රී පාදස්ථානය සංචාරය කරන දෙස් විදෙස් සංචාරකයන්ගෙන් මුදල් අයකර ප්‍රවේශපත්‍රයක් ලබාගත යුතු බවට ගැසට් පත්‍රයක් නිකුත් කර තිබුණා.
එම ගැසට් පත්‍රය අනුව නල්ලතන්නිය සහ රත්නපුර – පලාබද්දල වනජීවී කාර්යාලවලින් අවාරයේ ශ්‍රී පාදස්ථානය සංචාරය කරන විදෙස් සංචාරකයෙකුගෙන් ඩොලර් 05ක් ද,සාර්ක් කලාපීය රටවල්වලින් පැමිණෙන සංචාරකයන් සදහා ඩොලර් 04ක
මුදලක් ද, දේශිය සංචාරකයන්ගෙන් රුපියල් 40ක මුදලක් ද අය කෙරෙනවා.
ඒ, අනුව ඉකුත් 04 වන දින සිට එම කාර්යාල දෙකෙන් දෙස් විදෙස් සංචාරකයන් සඳහා මුදල් අයකර ප්‍රවේශපත්‍ර නිකුත් කිරිමට විරෝධය පාමින් මහ සංඝ රත්නය, ප්‍රදේශවාසීන් සහ ශ්‍රි පාදස්ථානයේ සංචාරයක් සදහා පැමිණි විදේශීය සංචාරකයින් පිරිසක් එක්ව මෙම විරෝධතාවය පැවැත්වුවා.
මේ අතර ජනාධිපති රනිල් වික්‍රමසිංහ සහ වනජිවි සහ වන සංරක්ෂණ අමාත්‍ය පවිත්‍රා වන්නිආරච්චිට ද මේ සම්බන්ධයෙන් නල්ලතන්නිය ප්‍රදේශවාසින්ගේ විරෝධතාවය දක්වන ලිපි යොමු කිරිමට පියවර ගෙන ඇති බවයි වාර්තා වුණේ.