ශ්රී ලංකාවේ ආයෝජන ආකර්ෂණය වැඩිදියුණු කිරීම, තරගකාරීත්වය ශක්තිමත් කිරීම සහ නව රැකියා අවස්ථා බිහිකිරීම ඉලක්ක කරගත් ආර්ථික ප්රතිසංස්කරණ වැඩසටහනක් සඳහා ඇමෙරිකානු ඩොලර් මිලියන 150ක මූල්ය සහාය ලබාදීමට ලෝක බැංකුවේ විධායක අධ්යක්ෂ මණ්ඩලය අනුමැතිය ලබාදී තිබේ.
මෙම මූල්ය ආධාරය ශ්රී ලංකාව ආර්ථික ස්ථාවරත්වය පමණක් නොව, දිගුකාලීන සහ තිරසාර ආර්ථික වර්ධනයක් කරා ගෙනයාම අරමුණු කරගත් Reforms for Growth, Resilience and Openness වැඩසටහනේ පළමු අදියර යටතේ ලබාදෙන බව ලෝක බැංකුව සඳහන් කරයි.
එම අරමුදල් මඟින් පෞද්ගලික අංශය මූලික කරගත් ආර්ථික සංවර්ධනය සඳහා අවශ්ය පසුබිම ශක්තිමත් කිරීම අපේක්ෂා කරන අතර, ප්රධාන ක්ෂේත්ර කිහිපයක ප්රතිසංස්කරණ සඳහා ද සහාය ලබාදීමට නියමිතය.
ඒ අනුව වෙළඳ බාධක අවම කිරීම, ආයෝජන පරිසරය වඩාත් හිතකර කිරීම, මූල්ය ක්ෂේත්රයේ ශක්තිමත්භාවය ඉහළ නැංවීම, රාජ්ය ව්යවසායන්හි පාලන ක්රමවේද සහ කාර්යක්ෂමතාව වැඩිදියුණු කිරීම, කාන්තා රැකියා සහභාගීත්වය පුළුල් කිරීම සහ විදුලිබල ක්ෂේත්රයේ තරගකාරීත්වය ඉහළ නංවා අඩු පිරිවැයකින් වඩාත් ගුණාත්මක සේවාවක් සැපයීම සඳහා අවශ්ය ක්රියාමාර්ග මෙම වැඩසටහනට ඇතුළත් වේ.
මේ අතර, ශ්රී ලංකාවේ අධ්යාපනය, සෞඛ්යය, බලශක්තිය, ප්රවාහනය සහ කෘෂිකර්මාන්තය ඇතුළු අංශ රැසක ක්රියාත්මක ව්යාපෘති 13ක් සඳහා මේ වන විටත් ඇමෙරිකානු ඩොලර් බිලියන 1.5කට වැඩි සක්රීය මූල්ය දායකත්වයක් ලෝක බැංකුව විසින් සපයමින් සිටී.