මුදල් ගෙවූ පෙට්‍රල් නෞකාවේ තොග ගොඩබෑම අද (20) ආරම්භ කරන බව ලංකා ඛනිජ තෙල් නීතිගත සංස්ථාව පවසයි.
එහි සභාපති සුමිත් විජේසිංහ මහතා සඳහන් කළේ එහි පෙට්‍රල් මෙට්‍රික් ටොන් 37,000 ක් පවතින බවයි.
මේ අතර අයි. ඕ. සී. සමාගම ඇනවුම් කළ පෙට්‍රල් නෞකාවකින් තොග ගොඩබෑම ඊයේ (19) රාත්‍රියේ ආරම්භ වූ බවද සභාපතිවරයා ප්‍රකාශ කළේය.
ඔහු පැවසුවේ සංස්ථාවේ පෙට්‍රල් බෙදා හැරීමේ කටයුතු කඩිනමින් ආරම්භ කිරීමට සැලසුම් කර ඇති බවයි.
මේ අතර මෙරටට සේන්දු වූ ඩීසල් නෞකාවේ, ඩීසල් ගොඩබෑම මේ වනවිට අවසන්ව තිබේ.
ඩීසල් බෙදාහැරීම අඛණ්ඩව සිදුවන බව ද සභාපතිවරයා ප්‍රකාශ කළේ ය.
මේ අතර දිවයිනේ ප්‍රදේශ රැසක පෙට්‍රල් ඇතුළු ඉන්ධන ලබා ගැනීම සඳහා තවදුරටත් දිගු පෝලිම් දැකගත හැකිවේ.
බොහෝ පිරවුම්හල්වලින් පෙට්‍රල් නිකුත් කිරීමක් සිදුවූයේ නැත.