අගෝස්තු මස 01 වැනිදා සිට සැප්තැම්බර් 15 වැනිදා දක්වා මෙරට වී අස්වනු නෙළීමේ කටයුතු ආරම්භ කරන බැවින් ඒ සඳහා කඩිනමින් ඩීසල් ලීටර් කෝටි දෙකක් එනම් දහතුන් දහස් දෙසීයක් බැගින් වූ බවුසර් 1500 අවශ්‍ය වන බව එක්සත් සහල් නිෂ්පාදකයන්ගේ සංගමයේ සභාපති මුදිත පෙරේරා පවසයි.
ඊයේ (21) පැවති මාධ්‍ය හමුවකට එක්වෙමින් හෙතෙම අවධාරණය කළේ එය කඩිනමින් කළමනාකරණය නොකළහොත් රට බරපතළ ආහාර අර්බුදයකට මුහුණ පෑමට සිදුවන බවයි.
වී වගාව හෙක්ටයාර් ලක්ෂ හතරක පමණ සිදු කොට තිබෙන බව එහිදී ප්‍රකාශ කළ මුදිත පෙරේරා කියා සිටියේ වී අස්වැන්න නෙළීම සඳහා ඉන්ධන වෙන්කරවා ගැනීමට දින 40ක පමණ කාලයක් රජයට පවතින බවයි.
කුසගින්න සහ ආහාර හිඟයක් ඇති වුවහොත් ඊට විසඳුමක් ලබාදීමට නොහැකි වන බව එහිදී පෙන්වා දුන් ඒ මහතා අවධාරණය කළේ අඩුම තරමේ දිවයිනේ ඇති සමූපකාර ඉන්ධන පිරවුම්හල්වලින් හෝ ගොවීන්ගේ අස්වනු නෙලීම සඳහා අවශ්‍ය ඉන්ධන ලබා දීම සඳහා කුමන හෝ වැඩපිළිවෙළක් සූදානම් කළ යුතු බවයි.