ඉබෝලා වෛරසයට සමාන ‘මාබර්ග් වෛරසය’ වැළඳුණු ආසාදිතයින් දෙදෙනෙක් බටහිර අප්‍රිකාවේ පිහිටි ඝානා රාජ්‍යයෙන් හමු වූ බවට විදෙස් වාර්තා ඊයේ (18) සඳහන් කළේය.
මෙලෙස හඳුනාගත් ආසාදිතයින් දෙදෙනා මිය ගොස් ඇති බව මේ වනවිට තොරතුරු වාර්තා වෙයි. රසායනාගාර වාර්තා මඟින් තහවුරු වී ඇත්තේ මාබර්ග් වෛරසය මෙම මරණවලට හේතුවී ඇති බවයි.
මෙම රෝගීන්ට පාචනය, උණ, ඔක්කාරය සහ වමනය ඇතුළු රෝග ලක්ෂණ පෙන්නුම් කර ඇති බව සෞඛ්‍ය අංශ පවසයි. මේ හේතුවෙන් පුද්ගලයින් 98 දෙනෙකු නිරෝධායනයට යොමු කර ඇති බව ඝානා සෞඛ්‍ය බලධාරීන් සඳහන් කළේය.
කෙසේනමුත් මාබර්ග් වෛරසය සඳහා තවමත් ප්‍රතිකාරයක් සොයාගෙන නොමැත.