සිය බිරිඳ සමඟ ත්‍රිරෝද රථයකින් පැන යමින් සිටි අනියම් සැමියකු පිහියෙන් ඇන මරා දමීමේ චෝදනාවට වරදකරු කෙරුණු දෙදරු පියෙකුට කොළඹ මහාධිකරණ විනිසුරු නවරත්න මාරසිංහ මහතා විසින් මරණීය දණ්ඩනය නියම කර තිබෙනවා.
ඔහු කොළඹ, මෝදර ප්‍රදේශයේ පදිංචි අයෙක්.
2018 වසරේ මාර්තු මස 12 වැනි දින සවස මෝදර රන්දිය උයන මහල් නිවාස සංකීර්ණයේ දොරටුව අසල දී මෙම මිනීමැරුම සිදු වූ බව නඩු විභාගයේ දී අනාවරණය වූ බවයි වාර්තා වන්නේ.
මරණය සිදු කිරීමේ චේතනාවෙන් පිහි ඇනුම් 16 ක් මරණකරු වෙත එල්ල කොට විත්තිකරු මෙම මරණය සිදු කර ඇතැයි සඳහන් කළ විනිසුරුවරයා මේ තුළින් ඔහු සැලසුම් සහගත චේතනාවකින් මෙම අපරාධය සිදුකර ඇති බවත් කියා සිටියා.
ඒ අනුව විත්තිකරුට එරෙහිව පැමිණිල්ල විසින් එල්ල කර තිබෙන චෝදනා සාධාරණ සැකයකින් තොරව ඔප්පු වී ඇතැයි තීන්දු කළ මහාධිකරණ විනිසුරුවරයා අනතුරුව මෙම දඬුවම ප්‍රකාශයට පත් කර තිබෙනවා.