නව පොලිස්පතිවරයෙකු පත් කිරීම සහ ඉහළ නිලධාරීන් පත් කිරීම විනිවිද භාවයකින් සිදු විය යුතු කටයුත්තක් බව ශ්‍රී ලංකා නීතිඥ සංගමය පවසනවා.
ජනාධිපති රනිල් වික්‍රමසිංහ වෙත ලිපියක් යොමු කරමින් නීතිඥ සංගමය පෙන්වා දෙන්නේ අදාළ කටයුතු මහජන විශ්වාසය තහවුරු වන ආකාරයෙන් සිදුවිය යුතු බවයි.
2023 මාර්තු 23 වැනිදා පොලිස්පති ධුරය පුරප්පාඩු වීමට නියමිත බවට දැනගන්නට ලැබී ඇති අතර නව පොලිස්පතිවරයෙකු ලෙසට හොඳම නිලධාරියෙකු පත්කිරීම ඉතා වැදගත් බව එම ලිපියේ සඳහන්.
ශ්‍රී ලංකා නීතිඥ සංගමය පෙන්වා දෙන්නේ පසුගිය දශක කිහිපය තුළ ශ්‍රී ලංකා පොලිසිය කෙරෙහි මහජන විශ්වාසය බරපතළ ලෙස බිඳවැටී ඇති බවයි.
ස්වාධීනත්වයක් නොමැතිකම, දේශපාලනීකරණය, ම්ලේච්ඡත්වය, අත්අඩංගුවට පත්වූවන්ගේ මරණ, වෘත්තීයභාවය නොමැතිකම ඇතුළු කරුණු පොලිසිය කෙරෙහි මහජන විශ්වාසය පළුදු වීමට දායක වී ඇති බවයි එම ලිපිය මගින් පෙන්වා දී ඇත්තේ.
මීළඟ පොලිස්පතිවරයා පොලිස් බලකායට ආදර්ශවත් සහ කිසිදු කැළලක් නොමැති මහජන විශ්වාසය නැවත ඇති කිරීමට හැකි ආකාරයෙන් එම සේවයේ නියුතු නිලධාරියෙකු වීම අතිශයින්ම වැදගත් බව ද නීතිඥ සංගමය ප්‍රකාශ කර තිබෙනවා.
එමෙන්ම විවිධ අපරාධවලට සැකකරුවන් ලෙස නම් කරන පොලිස් නිලධාරීන්ට උසස්වීම් ලබාදීම ශ්‍රී ලංකා පොලිසියේ පුරුද්දක් වී ඇතැයි ද ඔවුන් ජනාධිපතිවරයා වෙත යොමු කළ ලිපියේ සඳහන්.
පොලිස්පති පත්කිරීමේදී විධායකය විසින් ඉහළ ප්‍රමිතීන් අනුගමනය කළ යුතු බව තම සංගමයේ මතය බවයි එහි දැක්වෙන්නේ.
ඉහත සඳහන් තත්ත්වයන් තුළ අපරාධ නඩු හෝ නීති විරෝධී ක්‍රියාකාරකමකට සම්බන්ධ බවට චෝදනා ඇති අයෙකු පොලිස්පති ධුරයට පත් නොකරන ලෙසටයි ජනාධිපතිවරයා වෙත යොමු කළ ලිපිය මගින් අවධාරණය කර ඇත්තේ.