හෙදියක විසින් ලබාදුන් කිරි තේ කොප්පයක් පානය කිරීමෙන් පසුව සිහිසුන් වූ බව පවසමින් වෛද්‍යවරයෙකු රෝහල්ගත වීමේ පුවතක් තංගල්ල මූලික රෝහලෙන් වාර්තා වනවා.
කාරියමඩිත්ත රෝහලට අනුයුක්තව සේවය කරන වෛද්‍යවරයෙකු ඊයේ (07) රාත්‍රි මෙලෙස රෝහල් ගත වී ඇති බවයි පොලිසිය සඳහන් කළේ.
රාජකාරියේ නිරත වන අතරතුර අදාළ හෙද නිලධාරිනිය විසින් තමාට කිරි තේ කෝප්පයක් ලබා දුන් බවත්, එය පානය කර නිල නිවසට ගිය පසු තමන් සිහිසුන් වූ බවත් එම වෛද්‍යවරයා පවසා තිබෙනවා.
සිද්ධිය සම්බන්ධයෙන් මිද්දෙණිය පොලිසියට වෛද්‍යවරයා විසින් පැමිණිල්ලක් ද සිදුකර ඇති බවයි පොලිසිය සඳහන් කළේ.
51 හැවිරිදි වියේ පසුවන අදාළ වෛද්‍යවරයා කොළඹ පදිංචිකරුවෙකු වන අතර ඔහු වෛද්‍ය නිල නිවාසයේ තනිව ජීවත්ව ඇති බව සඳහන්.