කොල්ලුපිටිය ප්‍රදේශයේ දෙමහල් ගොඩනැඟිල්ලක පවත්වාගෙන ගිය ගණිකා නිවසක් වටලා සුරූපී තායි තරුණියන් දෙදෙනෙක් ඇතුළු පස්දෙනෙකු අත්අඩංගුවට ගෙන තිබෙනවා.
පානදුර වලාන මධ්‍යම දූෂණ මර්ධන ප්‍රහාරක බලකාය විසින් මෙම වැටලීම සිදුකර ඇති බවයි වාර්තා වුණේ. අත්අඩංගුවට ගැනුණු පිරිස අතර තායි තරුණියන් දෙදෙනාට අමතරව මෙරට තරුණියක්, එහි කළමනාකරු සහ ගණිකා ජාවාරම මෙහෙයවූ හිටපු හමුදා නිලධාරියෙක් ද වනවා.
අත්අඩංගුවට ගත් පිරිස අතර සිටින මෙරට තරුණියගේ හත් හැවිරිදි දියණිය ද එම ස්ථානයට කැඳවාගෙන තිබූ බවයි පොලිසිය පවසන්නේ. ලද තොරතුරකට අනුව පොලිස් උපාය දූතයකු යොදවා රුපියල් 10,000ක මුදලක් දී කාන්තාවක් මිලදී ගැනීමෙන් පසු මෙම වැටලීම සිදුකර තිබෙනවා.
ගණිකා වෘත්තියේ යෙදෙමින් එම ස්ථානයේ රැඳී සිටි තායි තරුණියන් දෙදෙනාට ගුවන් ගමන් බලපත්‍ර පවා නොතිබූ බවයි පොලිසිය සඳහන් කරන්නේ. අත් අඩංගුවට ගත් 24 හැවිරිදි ශ්‍රී ලාංකික තරුණිය රුපියල් කෝටි දහයක පමණ දේපළවලට හිමිකම් කියන තැනැත්තියක් බවත් ඇයගේ නමින් සුඛෝපභෝගී මෝටර් රථ තුනක්, පිළියන්දල ප්‍රදේශයේ ඉදිකරමින් පවතින තෙමහල් නිවසක් ද ඇති බවට අනාවරණය කරගෙන තිබෙනවා.
එම සැකකාරියගෙන් සිදුකළ ප්‍රශ්න කිරීමේදී ගණිකා වෘත්තියේ යෙදෙමින් එම වත්කම් උපයාගත් බවට අනාවරණය කළ බවයි පොලිසිය වැඩිදුරටත් සඳහන් කළේ. මෙම වැටලීමත් සමඟ අත්අඩංගුවට ගත් ජාවාරම මෙහෙය වූ බව කියන හිටපු හමුදා නිලධාරියා අසනීප තත්ත්වයට පත්ව පොලිස් ආරක්ෂාව යටතේ කොළඹ ජාතික රෝහලට ඇතුළත් කිරීමටයි කටයුතු කර ඇත්තේ.
අත්අඩංගුවට ගත් තායි තරුණියන්ගෙන් ප්‍රකාශ ලබාගැනීම සඳහා තායිලන්ත තානාපති කාර්යාලය හරහා භාෂා පරිවර්තකවරයෙකුගේ සහාය ලබාගන්නා බවයි පොලිසිය පැවසුවේ. මෙම සුපිරි පන්නයේ ගණිකා නිවාසයට දේශීය මෙන්ම විදේශීය ධනවතුන් නිරන්තරයෙන් ආ ගිය බවට තොරතුරු අනාවරණය වී තිබෙනවා.