දීර්ඝ කාලයක සිට හෙරොයින් ජාවාරමේ නිරත වූ වාද්දුව මොල්ලිගොඩ පදිංචි මහේෂ් මදුශංක ප්‍රනාන්දු හෙවත් මොල්ලිගොඩ භූතයා නමින් අන්වර්ථ නාමයෙන් හඳුන්වන මත්ද්‍රව්‍ය ජාවාරම්කරුවකු වාද්දූව පොලිසිය මගින් අත්අඩංගුවට ගෙන තිබෙනවා.
21 හැවිරිදි මෙම සැකකරු වාද්දුව මහා විහාර පාර ප්‍රදේශයේ දී යතුරුපැදියකින් ගමන් කරමින් සිටියදී බුද්ධි අංශ නිලධාරීන් ගෙන් ලැබුණු තොරතුරක් මතයි ඊයේ පස්වරුවේ අත්අඩංගුවට ගනු ලැබුවේ.
වාද්දුව, මොරොන්තුඩුව, වස්කඩුව, පොතුපිටිය යන ප්‍රදේශවල දීර්ඝ කාලයක සිට හෙරොයින් ජාවාරම සිදු කළ මෙම සැකකරු සතුව තිබී හෙරොයින් ග්‍රෑම් 7 යි මිලි ග්‍රෑම් 200ක් ද පොලිසිය විසින් සොයාගෙන තිබෙනවා.
සැකකරු යතුරුපැදියෙන් ගොස් දීර්ඝ කාලයක් තිස්සේ මෙලෙස මත්ද්‍රව්‍ය ජාවාරමේ නිරතව ඇති අතර, මීට පෙර ද හෙරොයින් ජාවාරම් සම්බන්ධයෙන් ඔහුට එරෙහිව අධිකරණවල නඩු කිහිපයක්ම විභාග වෙමින් පවතින බව ද සඳහන්.
සැකකරු අද පානදුර මහේස්ත්‍රාත් හමුවට ඉදිරිපත් කිරීමට නියමිතයි.