දැනට බන්ධනාගාර තුළ පැතිර යන සරම්ප රෝගය කඩිනමින් පාලනය නොකළහොත් ඉදිරියේදී එම තත්ත්වය තවත් උග්‍රවීමට ඉඩ ඇති බව සෞඛ්‍ය අමාත්‍යාංශය බන්ධනාගාර දෙපාර්තමේන්තුවට දැනුම් දී තිබේ.
එබැවින් එම එන්නත වහාම බන්ධනාගාර නිලධාරීන්ට සහ සිරකරුවන්ට ලබාදෙන ලෙස සෞඛ්‍ය සේවා අධ්‍යක්ෂ ජනරාල් වෛද්‍ය අසේල ගුණවර්ධන බන්ධනාගාර කොමසාරිස්වරයා වෙත ලිපියක් මගින් දැනුම් දී තිබේ.
පසුගිය සති කිහිපය තුළ කොළඹ රැඳවුම් සහ වැලිකඩ බන්ධනාගාරවල සරම්ප රෝගය පැතිර යාමේ වැඩිවීමක් දක්නට ලැබුණු අතර රැඳවියන් සහ නිලධාරීන් 20 දෙනෙකුට පමණ රෝගය වැළඳී ඇති බව හඳුනාගෙන ඇත.
ඒ සමගම සරම්ප රෝගය බාහිර ප්‍රජාවටද පැතිර යාමේ අවදානමක් පවතින බවත් එම එන්නත නිලධාරීන්ට සහ සිරකරුවන්ට කඩිනමින් ලබාදීම බන්ධනාගාර දෙපාර්තමේන්තුවේ වගකීමක් බවත් සෞඛ්‍ය සේවා අධ්‍යක්ෂ ජනරාල්වරයා පෙන්වා දුන්නේය.