වෙනිසියුලාවට බලපෑ ප්රබල භූමිකම්පා මාලාව හේතුවෙන් මරණ සංඛ්යාව 2,295 දක්වා ඉහළ ගොස් ඇති බව නවතම වාර්තා සඳහන් කරයි.
ඉකුත් ජූනි 24 වැනිදා තත්පර 39ක පරතරයකින් රික්ටර් මාපකයේ 7.2 සහ 7.5 වශයෙන් දැක්වෙන භූකම්පන දෙකක් රටේ උතුරු–මධ්යම ප්රදේශයට බලපා තිබේ. මේ වන විට එම ව්යසනයෙන් පුද්ගලයන් 11,267 දෙනෙකු තුවාල ලබා ඇති අතර, ප්රධාන කම්පනයෙන් පසු පසුකම්පන 782ක් වාර්තා වී ඇතත් ඒවායේ ප්රබලත්වය ක්රමයෙන් අඩුවෙමින් පවතින බවද සඳහන් වේ.
විපතට පත් ප්රදේශවල මුදාගැනීමේ කටයුතු අද වන විට හත්වන දිනයටත් ක්රියාත්මක වන අතර, ජාත්යන්තර මුදාගැනීමේ කණ්ඩායම් 4,000කට අධික පිරිසක්, වෙනිසියුලා හමුදා, පොලිස් සහ ගිනි නිවන අංශ ඇතුළු 26,000කට ආසන්න පිරිසක් සහ ස්වේච්ඡා සේවකයන් 17,800කට වැඩි සංඛ්යාවක් මේ සඳහා යොදවා ඇත.
කෙසේ වෙතත් මේ වන විට මුදාගැනීමේ මෙහෙයුම්වලට වඩා මානුෂීය ආධාර බෙදාහැරීම කෙරෙහි වැඩි අවධානයක් යොමු වී තිබේ.
සුන්බුන් අතර තවමත් සිරවී සිටින පිරිස පිළිබඳ නිශ්චිත තොරතුරු නොමැතිවීම විශාල ගැටලුවක් වී ඇත. එක්සත් ජාතීන්ගේ සංවිධානය ඇතුළු ජාත්යන්තර ආධාර ආයතන ඇස්තමේන්තු කරන්නේ තවමත් 50,000කට ආසන්න පිරිසක් අතුරුදන්වී හෝ සොයා ගැනීමට නොහැකිව සිටින බවයි. සිවිල් දත්ත පද්ධති අනුව එම සංඛ්යාව 43,000 ඉක්මවන බවද වාර්තා වේ.
දරුණුතම හානියට ලක්වූ ලා ගුවයිරා වෙරළබඩ ප්රදේශයේ කැටියා ලා මාර්, කරබලෙඩා සහ ලොස් කොරාලස් වැනි ස්ථානවල මේ වන විට දිරාපත් වන මළ සිරුරු හේතුවෙන් දැඩි දුර්ගන්ධයක් පැතිරී යන බවද වාර්තා වේ. සුන්බුන් අතර තවමත් සිරුරු පවතින බවට එය සාක්ෂියක් ලෙස සැලකෙන අතර, සැබෑ මරණ සංඛ්යාව තවත් ඉහළ යා හැකි බව ප්රදේශවාසීහු බිය පළ කරති.
වසර ගණනාවක් පුරා පැවති ආර්ථික අර්බුද හේතුවෙන් රටේ ආයතනික ක්රමවේද දුර්වල වී තිබීම මෙවැනි විශාල ව්යසනයකට ප්රතිචාර දැක්වීම තවත් අපහසු කර ඇති බවද සඳහන් වේ.
ලා ගුවයිරා ප්රදේශයේ මෘත ශරීරාගාර පිරී ඉතිරී ගොස් ඇති අතර, වරාය ආසන්නයේ තාවකාලික එළිමහන් ස්ථාන සකසා මළ සිරුරු හඳුනා ගැනීමට පවුල්වලට අවස්ථාව ලබා දී ඇත.
මේ වන විට පවුල් 81,589කට සහන ලබා දී ඇති අතර ආහාර කිලෝග්රෑම් මිලියන 8.89ක් බෙදාහැර ඇති බවද වාර්තා වේ. රෝගීන් 17,026 දෙනෙකුට වෛද්ය ප්රතිකාර ලබා දී ඇති අතර ඉන් 4,565 දෙනෙකු රෝහල්ගත කර ඇත.
එමෙන්ම නිවාස අහිමිව අවතැන් වූ සංඛ්යාව 12,841ක් ලෙස සඳහන් වන අතර රට පුරා තාවකාලික කඳවුරු 25ක් ක්රියාත්මක වේ. අන්තර්කාලීන ජනාධිපතිනි ඩෙල්සි රොඩ්රිගස්ගේ නියෝගය අනුව එම කඳවුරු තවදුරටත් ශක්තිමත් නවාතැන් ලෙස සංවර්ධනය කිරීමට කටයුතු කරමින් පවතී. එසේම වෛද්යවරුන්, හෙදියන් සහ ආරක්ෂක අංශ සාමාජිකයන් සඳහා කරකස් නගරයේ හෝටල්වල තාවකාලික නවාතැන් පහසුකම්ද සලසා ඇත.
ප්රතිසංස්කරණ කටයුතු ආරම්භ වී තිබුණද පානීය ජල හිඟය, විදුලි බිඳවැටීම් සහ සන්නිවේදන ගැටලු හේතුවෙන් ජනතාව දැඩි අපහසුතාවයට පත්ව සිටිති. තවදුරටත් පසුකම්පන ඇතිවිය හැකි බවට ඇති බිය නිසා බොහෝ දෙනා ඉරිතලා ඇති නිවාසවලට නැවත යාම ප්රතික්ෂේප කරන බවද වැඩිදුරටත් සඳහන් වේ.