ලෝක කුසලාන පාපන්දු තරගාවලියේ මෙරට වේලාවෙන් අද (10) අලුයම පැවති තීරණාත්මක තරගයකදී මොරොක්කෝ කණ්ඩායම ගෝල 2-0කින් පරාජය කළ ප්රංශය, සිය ප්රබලත්වය නැවතත් තහවුරු කරමින් අවසන් පූර්ව වටයට සුදුසුකම් ලබාගත්තේය.
මෙම පරාජයත් සමඟ මෙවර තරගාවලියේ මොරොක්කෝ කණ්ඩායමේ ගමන අවසන් වූ අතර, වත්මන් අනුශූරයන් වන ප්රංශය මීළඟ වටය සඳහා සිය ස්ථානය තහවුරු කරගැනීමට සමත් විය.
තරගයේ ආරම්භයේ සිටම කණ්ඩායම් දෙකම දැඩි ආක්රමණාත්මක ක්රීඩා රටාවක් අනුගමනය කළ අතර, ආරක්ෂක පෙළද ශක්තිමත්ව පවත්වාගෙන යාමට දෙපාර්ශ්වයම සමත් වූහ.
පළමු අර්ධයේදී ප්රංශයේ සුපිරි ක්රීඩක කයිලියන් ම්බාපේට හිමි වූ දඬුවම් පහර අවස්ථාවක් මොරොක්කෝ දැල් රකින්නා සාර්ථකව වළක්වා ගැනීම හේතුවෙන්, අර්ධ කාලය අවසන් වන විට කිසිදු කණ්ඩායමක් ගෝලයක් වාර්තා කර නොතිබුණි.
කෙසේ වෙතත් දෙවන අර්ධය ආරම්භ වීමත් සමඟ තරගයේ පාලනය ක්රමයෙන් තමන් වෙත ගත් ප්රංශය, ප්රතිවාදී ආරක්ෂාවට දැඩි පීඩනයක් එල්ල කළේය.
පළමු අර්ධයේ අහිමි වූ අවස්ථාවට පිළිතුරු ලබාදුන් කයිලියන් ම්බාපේ, 60 වැනි මිනිත්තුවේදී මොරොක්කෝ ආරක්ෂක පෙළ බිඳ දමමින් ප්රංශය වෙනුවෙන් පළමු ගෝලය වාර්තා කළේය.
ඉන් අනතුරුවත් සිය ආක්රමණය නොනවත්වාගෙන ගිය ප්රංශය වෙනුවෙන් ඔස්මාන් ඩෙම්බේලේ 66 වැනි මිනිත්තුවේදී දෙවැනි ගෝලය රැස් කළ අතර, ඒ අනුව ගෝල 2-0ක ජයක් ප්රංශයට හිමි විය.
මීට පෙර 2022 ලෝක කුසලාන පාපන්දු තරගාවලියේ අවසන් පූර්ව වටයේදීද මොරොක්කෝ කණ්ඩායම ප්රංශය හමුවේ ගෝල 2-0කින් පරාජයට පත්වූ අතර, මෙවර තරගයේදීද ඔවුන්ට එම ප්රතිඵලයම අත්විඳීමට සිදුවිය.
65,000කට අධික ප්රේක්ෂක පිරිසක් අසුන්ගත හැකි අමෙරිකාවේ බොස්ටන් ක්රීඩාංගණයේදී මෙම තරගය පැවැත්විණි.