ශ්රී ලංකාව දකුණු ආසියාවේ වේගයෙන්ම වයස්ගත වන ජනගහනයක් සහිත රටක් බවට පත්වෙමින් ඇති බව නවතම ජන හා නිවාස සංගණන දත්ත මඟින් අනාවරණය වී තිබේ.
එම වාර්තාවට අනුව, වයස අවුරුදු 60ට වැඩි පුද්ගලයන් මෙරට සමස්ත ජනගහනයෙන් සියයට 18ක් නියෝජනය කරන අතර, එය ජනගහනයෙන් ආසන්න වශයෙන් පහෙන් එකකට සමාන වේ.
දිස්ත්රික් මට්ටමින් වැඩිහිටි ජනගහනය වැඩිම ප්රමාණයක් වාර්තා වී ඇත්තේ කොළඹ, කෑගල්ල සහ ගම්පහ දිස්ත්රික්කවලිනි. මෙම ජන විකාශන වෙනස හේතුවෙන් රාජ්ය සේවා පද්ධතියට නව අභියෝග රැසක් මතුව ඇති අතර, විශේෂයෙන් සෞඛ්ය සේවා සහ යටිතල පහසුකම් සැලසුම් කිරීමේදී කඩිනම් වෙනස්කම් අවශ්ය බව ජාතික වැඩිහිටි ලේකම් කාර්යාලය පෙන්වා දෙයි.
තවද, දිවයින පුරා වැඩිහිටි පුද්ගලයන් 370,229 දෙනෙකු තනිව ජීවත්වන බවද හඳුනාගෙන තිබේ. ඒ හේතුවෙන් හදිසි රෝගී තත්ත්වයන්ට මුහුණ දීම, දෛනික අවශ්යතා සපුරා ගැනීම සහ හදිසි අවස්ථාවලදී උපකාර ලබා ගැනීම සම්බන්ධයෙන් ඔවුන් වැඩි අවදානමකට ලක්ව සිටින බව සඳහන් වේ.
විශේෂඥයන් පෙන්වා දෙන්නේ ප්රතිස්ථාපන මට්ටමට වඩා අඩු උපත් අනුපාතයක් දිගුකාලීනව පැවතීමත්, ජනතාවගේ ආයු අපේක්ෂාව ඉහළ යාමත් මෙම ජන විකාශන වෙනසට ප්රධාන හේතු වී ඇති බවයි.
දශක හතරකට පමණ පෙර ශ්රී ලංකාව තරුණ ජනගහනයක් වැඩි රටක් ලෙස සැලකුණු අතර, එම කාලයේදී වයස අවුරුදු 60 සහ ඊට වැඩි පුද්ගලයන් සමස්ත ජනගහනයෙන් නියෝජනය කර තිබුණේ සියයට 6.6ක් පමණි.