රූපලාවන්‍යාගාරයට පැමිණ එහි හිමිකාරියගේ ATM කාඩ්පත සොරකම් කර රුපියල් 90598ක් වටිනා භාණ්ඩ මිලට ගත් කාන්තාවක් අත්අඩංගුවට ගෙන තිබේ.
අවිස්සාවේල්ල පොලිස් ස්ථානයට කරන ලද පැමිණිල්ලක් මත සිදු කළ විමර්ශනයකට අනුවයි ඇය ඊයේ (10) අත්අඩංගුවට ගෙන ඇත්තේ.
අත්අඩංගුවට ගත් සැකකාරිය වයස අවුරුදු 20 ක් වන මාතර ප්‍රදේශයේ පදිංචිකාරියක් බවයි අනාවරණය වී ඇත්තේ.
අවිස්සාවේල්ල- පුවක්පිටිය ප්‍රදේශයේදී ඇය අත්අඩංගුවට ගෙන ඇති අතර සැකකාරිය වරකාපොල හා ගම්පොල යන ප්‍රදේශවලද මේ ආකාරයටම ATM කාඩ්පත් සොරකම් කර දේපල මිලට ගෙන ඇති බව මූලික පොලිස් විමර්ශනවලදී අනාවරණය වූ බවයි පොලීසිය පවසන්නේ.
සැකකාරිය අද (11) අවිස්සාවේල්ල මහේස්ත්‍රාත් අධිකරණය වෙත ඉදිරිපත් කිරීමට නියමිතය.