නීතිවිරෝධීව ගවයින් ප්‍රවාහනය කළ ලොරි රථයකට ඇඹිලිපිටිය පොලිසිය විසින් සිදුකළ වෙඩි තැබීමකදී එම රථයේ ගමන් කළ පුද්ගලයෙක් ජීවිතක්ෂයට පත්ව තිබේ.
ඇඹිලිපිටිය, මහපැලැස්ස ප්‍රදේශයේදී රාත්‍රි මුර සංචාරයක නිරතව සිටි පොලිස් නිලධාරීන් දෙදෙනකු එම මාර්ගයේ ගමන්ගත් සැකකටයුතු ලොරි රථයක් නැවැත්වීමට අණකර තිබෙන අතර එම අවස්තාවේදී අණ නොතැකූ ලොරි රථයේ රියදුරා පොලිස් නිලධාරීන් අනතුරට ලක් කිරීමට තැත් කරමින් පලායාමට උත්සාහ දරා ඇත.
එම අවස්ථාවේදී ක්‍රියාත්මක වූ පොලිස් නිළධාරීන් විසින් එල්ල කරන ලද වෙඩි පහරවල් මධ්‍යයේ පලාගිය රථයේ සිටි ගවයින් කැලෑබද ප්‍රදේශයකට මුදා හැර ඔවුන් වීරකැටිය ප්‍රදේශයට පලාගොස් ඇති බවයි වාර්තා වන්නේ.
මෙම වෙඩි වැදීමෙන් තුවාල ලැබූ පුද්ගලයෙකු හම්බන්තොට රෝහලට ඇතුළත් කර ඇති අතර ඔහු ඒ වනවිටත් මියගොස් සිට ඇති බවයි පොලීසිය පවසන්නේ.